दीपावली

आकांक्षा ही मनी आपुला देश थोर व्हावा ।
आप्तजनांना सतत सुखाचा प्रकाश हा द्यावा ॥
सहजपणाने शिवभावाने जीव हा पुजावा ।
पुसता अश्रू दीनजनांचे आनंद लाभावा ॥
अधर्म, अनीती अज्ञानाचा तिमिर दूर व्हावा ।
संस्काराचा दीप मानसी अखंड तेवावा ॥
देशासाठी देह आमुचा चंदन हा व्हावा ।
सत्कार्यातुनी ईशभक्तीचा सुगंध पसरावा ॥
मनामनामधी राष्ट्रभक्तीचा दीप पेटवुया ।
हृदयांतरी हा ध्यास घेऊनी दीपोत्सव करूया ॥

दीपावलीनिमित्त हार्दिक शुभेच्छा!

दीपावली

घराघरातून आळवू सारे चैतन्याचे सूर
चला लावूनि दीप करूया नैराश्याला दूर ।।

संस्कृती अपुली ही अतिप्राचीन
प्रकाशपूजा सांगे प्रतिदिन
पावित्र्याचे हे शुभलक्षण
'सत्य'प्रभावे कृष्ण संपवी इथेच नरकासूर ।।

पाने इथल्या इतिहासाची
पराक्रमाच्या  कथा सांगती
कर्तृत्वाला प्रेरक ठरती
समृद्धीचे वर्णन सांगे तो सोन्याचा धूर।।

विज्ञानाला अध्यात्माची
जोड अचूक ही इथे लाभली
शाश्वत मूल्ये सदैव जपली
या मूल्यांना घेऊन जाऊ आपण जगती दूर।।



दीपावलीनिमित्त हार्दिक शुभेच्छा !

महाराष्ट्र दिन

महाराष्ट्राच्या शूरवीरांची साक्ष देती हे सह्यकडे ।

स्फूर्ती घेऊनि त्यांच्यापासुनी राष्ट्र रक्षिण्या होऊ खडे ।। धृ.।।

तलवारीच्या तालावरती शूर नाचले थयाथया 

थयाथयाट तो पाहुनी करतो शत्रू त्यापुढे गयावया ।

आठवुनी त्या पराक्रमाला पाऊल टाकू सदा पुढे 

स्फूर्ती घेऊनि त्यांच्यापासुनी राष्ट्र रक्षिण्या होऊ खडे ।। १ ।।

गोब्राह्मण प्रतिपालक राजा इथेच झाला तो शिवबा 

महाराष्ट्राच्या जरिपटक्याला अटकपार ने राघोबा ।

राक्षसभुवनी माधवरावे निजामास चारिले खडे  

स्फूर्ती घेऊनि त्यांच्यापासुनी राष्ट्र रक्षिण्या होऊ खडे ।। २।।

त्या रक्ताचे वारस आम्ही भाग्य असे हो हे अमुचे 

हुंकाराने केवळ अमुच्या ऊर धडाडे शत्रूचे ।

राष्ट्रघातकी शोधून त्यांना चला देऊया उचित धडे 

स्फूर्ती घेऊनि त्यांच्यापासुनी राष्ट्र रक्षिण्या होऊ खडे ।। ३।।

गुढीपाडवा

आम्रफुलांचा सुगंध घेऊनि
लहर वायूची आली ।
सहज आळवी सुरेल पंचम
 कोकिळ प्रातःकाली ।।
तापतापतो जरी हा दिनकर
होय जिवाला त्रास ।
परी मोगरागंध देतसे
जगण्याचा विश्वास ।।
समयाचे हे भान ठेवुनी,
जगा तुम्ही धैर्याने ।
निसर्गराजा सांगत असतो
सदैव अपुल्या कृतिने।
ठेवून याची जाण करूया,
स्वागत नववर्षाचे ।
प्रसन्नता मंत्राने करूया,
सोने आयुष्याचे ।।
 
 हिंदू नववर्षाच्या हार्दिक शुभेच्छा !
  

गिरीप्रेमी

शिवसदनासी भगवे तोरण लावण्यास चालला ।

आज शुभेच्छा त्यास्तव देतो वंदुनी गणराया ।।

सह्याद्रीचे पुत्र चालले

शिव आशीष घेण्या

कैलासाचा नाथ आतुरला

शिवभक्ता भेटण्या

हिमालयावर सारे हरहर महादेव बोला ।।

रुद्राचा अवतार शिवाजी

स्वराज्य निर्माता

घेऊनि त्यांचे नाव करावे

वंदन हिमशिखरा

प्रसन्नता शिव सदनी होईल पाहून तुम्हाला ।।

अनुभव तुमचे सारे तिथले

उत्सुक आम्ही ऐकण्या

जीवनातल्या  पराक्रमाला

देतील जे प्रेरणा

शिव शंभूचा प्रसाद ऐसे बोल तुम्ही बोला ।।

वारकरी तुम्ही हिमालयाचे

भाग्यवान हो खरे

आशीष तुमच्या संगे असतील

महाराष्ट्राचे सारे

स्वागत करण्या पायघड्या या घालू हृदयाच्या ।।

गिरीप्रेमीच्या  पुणे एव्हरेस्ट २०१२ मोहिमेस हार्दिक शुभेच्छा !!!

रंगपंचमी यमुनाकाठी

क्षणापूर्वीची शांत यमुना करिते का खळबळ
अनपेक्षित हा कोठून आला मुक्त हास्यकल्लोळ ।।
हास्यवलय ते छेदित आला कानी मंजुळ स्वर
क्षणात पटली ओळख की हा श्याम मुरलीचा सूर ।।
यमुनेकाठी उभ्या गोपिका बावरल्या क्षणभर
शोध घ्यावया मुरलीधराचा भिरभिरते नजर ।।
तोच अचानक धावत आला गोपसख्यांचा मेळा
राधेसह त्या गवळणी झाल्या कृष्णाभवती गोळा ।।
रंगबिरंगी रंगीत चेहरे पाहून ध्यानी आले
रंगपंचमी खेळत सारे यमुनाकाठी आले ।।
जमल्या साऱ्या गोपगोपिका गोकुळ अवघे आले
हिरवे, पिवळे, लाल, गुलाबी रंग विविध उधळले ।।
गुलाल उधळे कुणी अचानक, कुणी उडवे पिचकारी
धुंद जाहले, रंग खेळता सान थोर नरनारी ।।
गीत गातसे राधा देई साथ त्यास मुरली
रासनृत्य ते करता सारी भान हरपुनी गेली।।
भाग्यवान ती यमुना अवघे गोकुळही ठरले
भाग्याचे त्या वर्णन करता शब्दच मम सरले।।

वसंत

वसंत म्हणजे ऋतुंचा  राजा. साहजिकच त्याचे फलांच्या राजाशीही नाते आहेच. आणि म्हणूनच कोकणात वसंताचे दर्शन अधिक विलोभनीय असते. खरं सांगायचं तर कोकण परिसरात या काळात सारी सृष्टी म्हणजेच एक काव्य असतं ! त्या सौंदर्यसागरातील हा एक थेंब नजरेला गवसलेला....

सौंदर्याचे कुंभ बहुत हे
पदोपदी वाटेत सांडले ।
जणू प्रदर्शन विभवाचे हे
परामात्म्याने इथे मांडले ।।

हर्षभरीत हा वायू सांगे
वसंताची चाहुल लागली ।
मनास जुळवित प्रीती धागे
करवंदीची जाळी फुलली ।।

आम्रतरुंना  आला मोहर
सुगंध त्याचा करितो धुंद ।
पंचमात गाउनिया सुस्वर
जपे कोकिळा अपुला छंद ।।

रोमांचित फणसाची कुवरी
हितगुज करिती माडपोफळी ।
बोंडूची या लज्जत न्यारी
अमृतानुभव देती शहाळी ।।

परीक्षेसाठी शुभेच्छा !

धवल यशाने तुझ्या लाभू दे मायपित्यांना कीर्ति ।
परीक्षेस या आज शुभेच्छा तुजला देतो आम्ही ।।

गुरुजनांनी आजवरी जे तुजसी  दिधले ज्ञान
परिश्रमाने, स्वाध्यायाने केले तू विकसित ।
त्या अभ्यासा प्रकट कराया, असे हीच संधी
उगा कशाला परीक्षेस मग भ्यावे सांग मनी ।।

पालक, गुरुजन पद वंदोनी आशीष त्यांचे घ्यावे
शांत मनाने, प्रसन्नतेने परीक्षेस हे जावे ।
बुद्धिदेवता मंगलमूर्ती ह्रुदयांतरी ठेवावी
ऋद्धि सिद्धि बघ सहजच येतील यशमाला घेउनी ।।

सर्व विद्यार्थीमित्रांना, परीक्षेसाठी  हार्दिक  शुभेच्छा !  

संक्रांत संदेश

तीळगुळ घेउनी गोड बोलूया, सांगतसे सण संक्रांती
मनामनाचे बांध बांधुया, प्रेम ठेवू ओठी पोटी || धृ. ||

संक्रमणातुन प्रगती घडे ही, संक्रांती दे नित संदेश
घडता परिवर्तन नित येती, प्रगतीचे नव नव उन्मेष |
फेका औदासिन्य मनाचे, सत्कार्या घेऊ हाती
नव्या युगाच्या वाटेवरती, गति घेऊ प्रगतीसाठी || १ ||

संक्रमणाचे तत्त्व अनादि, निसर्ग आम्हा सांगतसे
अखंड अविरत अवकाशातुन, रथ सूर्याचा चालतसे |
सतत वाहते सरिता निर्मल, खडक दरी लंघुन जाई
विशालता तिची कळते क कधी, बघता तीज उगमाठायी || २ ||

सत्य शिवाची पुण्य कल्पना, मनोमनी संक्रांत करू
समाजमंदिर सुंदर करण्या, एकजुटीने यत्न करू |
समर्पणाचे तत्त्व शिकुया, करू साजरी संक्रांती
बीज नुरे डौलात तरु डुले, ही सृष्टिची परिपाठी || ३ ||

संक्रांतीच्या  हार्दिक  शुभेच्छा !